ब्रेकिंग

विदेश

पूर्व जेरुसलेममधील संयुक्त राष्ट्रांच्या सहा शाळा बंद

Samruddhi Dhayagude
09 May 2025

जेरुसलेम : इस्रायलने गुरुवारी पूर्व जेरुसलेममधील संयुक्त राष्ट्रांच्या सहा शाळा कायमच्या बंद केल्या. त्यामुळे ८०० हून अधिक विद्यार्थ्यांच्या शिक्षणावर प्रश्नचिन्ह निर्माण झाले. पॅलेस्टिनी विद्यार्थ्यांना तिथून निघून जावे लागले. गेल्या महिन्यात सशस्त्र इस्रायली पोलिस आणि शिक्षण मंत्रालयाच्या अधिकार्‍यांनी पूर्व जेरुसलेममधील सहा शाळा ३० दिवसांच्या आत बंद करण्याचे आदेश दिले होते. त्यानुसार बुधवारी या शाळा बंद करण्यात आल्या. पॅलेस्टिनी निर्वासितांसाठीची संयुक्त राष्ट्रांची यूएनआरडब्ल्यू ही एजन्सी या सहा शाळा चालवते. इस्रायलच्या ताब्यातील वेस्ट बँकमध्ये ही एजन्सी शाळा चालवते, ज्या अजूनही कार्यरत आहेत.

७ ऑक्टोबर २०२३ रोजी गाझामध्ये युद्धाला सुरुवात करणार्‍या हमासच्या इस्रायलवरील हल्ल्यांनंतर तीव्र झालेल्या एजन्सीविरुद्धच्या दीर्घ मोहिमेचा हा शेवट आहे. इस्रायलचा दावा आहे की, यूएनआरडब्ल्यू शाळा यहूदीविरोधी सामग्री आणि इस्रायलविरोधी भावना शिकवतात, हे आम्हाला नको आहे. १९६७ च्या मध्यपूर्व युद्धात इस्रायलने ताब्यात घेतलेल्या पूर्व जेरुसलेममधील पॅलेस्टिनी निर्वासितांना शिक्षण आणि आरोग्य सेवा देणारी यूएनआरडब्ल्यू ही मुख्य संस्था आहे.